Hier sind immer die neuesten Nachrichten und Mitteilungen aus unserem Vereinsleben zu finden.

Unter AKTIVITÄTEN  kann man wichtige Ereignisse aus unserem Vereinsleben nachlesen.

Unter PERSONALIA  gibt es Hinweise zu Geburtstagen, Jubiläen und anderen wichtigen Ereignisse zu Personen die mit dem MGV-Aresing verbunden sind

 Viel Spaß beim Stöbern

Fast alle aktiven Sänger mit Frauen und teilweise Familie erlebten ein sehr schöne und ruhige Weihnachtsfeier. Die Schrobenhausener Hoagart'n Musi untermalte mit bewährter Weise auf Hackbrett, Zither, Harfe, Flöte und Guitarre die vorweihnachtliche Stunde.

Nach der Begrüßung durch den Vorstand und Gesangsvortrag "Jetzt fangen wir zum Singen an" trug Ulli Mahl mit "Das ewige Wort wird nur in der Stille laut"  - Gedanken zum Advent von Helmut Zöpfl vor. Weitere Chorvorträge waren "Grünet Felder, Grünet Wiesen", Es ist für uns eine Zeit angekommen" und Es wird scho glei dumpa", dazwischen ein weiterer Vortrag durch Elmar Tegel und zum Schluß schließlich gemeinsam das Lied "Macht hoch die Tür".

Doch bevor es zur gemütlichen Unterhaltung überging erschien der Nikolaus um uns die Leviten zu lesen. In überaus gelungener Versform hatte Jakob Beierl das Jahr Revue passieren lassen und dabei auch einiges zum Nachdenken mit auf den Weg fürs nächste Jahr gegeben.

MGV- Nikolaus 2011 von Jakob Beierl

Grüaß Gott – da Niklaus is do!
Es kennt’s mich do? – I kenn eich scho!
De gleichn G’sichter - oida bloß
Mit neie G’sichter is nix los?
De Werbung im G‘moablattl hat’s -
fui a net brocht – und war für'd Katz.
Kannst moan‘, dass M-G-V zur zeit
„Mindestens Groß-Vater“ bedeit.

Wia i eich kenn, dat’s es jetz gern
a guate Predigt vo mir hör’n.
Da Pfarrer dat des ganz gelassen
in drei Gedanken z’samma fassen
und bräuchat's überhaupt koan Grund,
dass oana drüber lacha kunnt.
Für‘n Nikolaus is‘ net so leicht,
dass der sei Publikum erreicht:
Do soll’s zum Schmunzln geb‘m grad gmua
und reimen solls es ano dazua.
Wenn des doch bloß so oafach wär -
mit Leit, so unspekatakulär!

I schaug – wos bessers foit ma d‘rum net ei –
oafach in den Kalender nei:
Scho im Aprui habt’s an „Event“
(wia ma des heit so auf Neideitsch nennt)
veranstaltet – wia hoaßt des Fest? -
Ja: „Donaumoosgau-Songcontest“
Do war Arbat g’rad g’nua zum tua
Und de Aktiven ganz alloa
kunnt’n net ausschenka, serviern,
Kaffee aufbrüha’n und abkassier’n,
Kuacha aufschneid’n – und vorher bacha
und wos woaß ich für Arbad’n macha.
Drum greift ma gern auf'd Frau‘n zurück –
De meist’n hob’m oane, zum Glück.
De san ois Gratis-Personal
für solche Zwecke ideal.
De Damen reißen‘s jedsmoi raus –
Drum gibt’s für de jetz an Applaus…


In Anbetracht wo’s do habt’s g’sunga,
seid’s über eiern Schatten g’sprunga:
Den Aresinger Heimatmarsch
hab I do g‘hört – leck mi  am …(psst)
Scho vor zwanzg Johr habt’s den probiert -
und schnoi davor kapituliert.
Doch desmoi habt’s des schware Liad
in kurzer Zeit nei einstudiert
und vortrog’n – aa dermaß’n guat,
dass I scho sog’n muass: I ziag mein Huat!
So war’s jetz doch net ganz für Katz,
Dass  F.C. Schmidt, seelig den Satz
net bloß für g’mischt’n Chor und Bloskapoi’n
sondern aa für’n Männerchor hot setz’n woi’n.

Den rot’n Frack mit’m schwarz’n Krog’n
Habt’s heier ziemlich oft o’zog’n.
Net soit‘n habt’s as braucht, des G’wanderl
zum Singa von Geburtstagsstanderl.
Weil grod de sechz’g und siebz’g Johr Oid’n
San ja bei eich nimma so soit’n
So war a Siebz’ger Jubilar
Da „Mister MGV“ – unser Elmar!
Dem muaß I no an Extragruß
bringa vom Sankt Christophorus!
Ois Schutzpatron für Reisende
hod a vui Arbat g’habt mit de!
Im Hirn vom Elmar is oiss drinn –
außer an Orientierungssinn.
Darum hot a eam im Traum ei’geb‘m
Da heilige Christophorus,
dass, wenn er no de Achtz’ger wui erleb‘m
er si endlich an Navi kaffa muß.
Und tatsächlich: Kafft hot er’s scho –
Hoff‘ ma, dass er‚s a bediena ko!

Doch zruck zu unseren Jubilaren:
Da Jüngste war mit sechzig Jahren
Vorstandsvize Zeitlmair
bei dem war’s aa a zünftige Feier.
Habt’s ös überigens scho g’wisst
Dass der seit kurzem Rentner ist?


Von da Schromhaus‘ner Fraktion
Do hob’m im letzt’n Johr zwoa schon
an Siebz’ga g’habt, wenn ma‘s aa net –
von Weit’n o’schaugt - glaub’n tät:
Da Peter, der Post-Pensionist,
doch im Herz’n a Eisenbahner ist.
da Mair Rudi is da Andrer:
Ois Walker saust der umanander,
is körperlich unbandig fit –
do hoit manch Jüngerer net mit.

Im Pfarrheim war, so hob I g’hert
wieder a Sänger-Wunschkonzert.
 „Aresing sucht den Supersong“
hoasat des im Fernseh- Schargong.
 „Tschanga Baranga“ war der Hit -
bei eiere Weiba – ös habt‘s mit
dem, wos ma vom Text vasteht -
(recht vui is des ja wirkli net)
zum Motto g’macht zwoa Zeilen d’raus:
(moi abgesehen vo unserm Klaus)
„Statt an Überkinga obezwinga,
do datat’s liaba no a Hoibe dringa“
Eig’lod’n - aber net do war‘n wieder -
amoi de passiven Mitglieder.
Dabei is net bloß für de Ohr’n
domois etwas boten word‘n:
Da Wax, Vota vom Dirigent,
der hot a Biofakke g’spend’t.
Da Woimo-Hans der hats des g’schlacht,
and’re hom Beilag’n dazua g’macht.
Auf jed’n Foi hot vo de Leit,
wo do war’n, koana des bereit.
Angeblich habt’s sogor vor‘m Schliaß’n
Den Saal gewaltsam rama müaß’n:
De Schruaf Resi hom’s gor zuletzt
Mit’n Stuikarrn an de Frischluft g’setzt.

Kurz drauf seid’s scho wieder auf’tre’n:
Im Wandrerheim drom is des gwe’n:
Do war von de Frauenbund-Madl
So wos wia Musikantenstadl
Da Martin, eier Dirigent
Der hätt se domois boid darennt:
Er is net nur mit‘m MGV
an dem Abend auf Bühne nau –
kaum wards ihr drunt, steht aa scho vor
eam aufgestellt: Da Kirchachor.

An dera Stoi möcht I an recht’n
schöna Dank dafür ei’flecht’n,
Martin, dafür, dass d‘ Organist
in unserer Pfarrkircha bist
und dass’d dem Kirchachor ausserdem
a Chance gibst, zum Überleb’m.
Bestimmt kriagst du dafür den Lohn
amoi von Firma „Gott und Sohn“!

Mit eich hot er scho aa sei G’frett:
Weil jeder sei eigne Vorstellung hätt,
wos und wia ma prob’m soi.
Do meckern oa: „Des geht ma z’schnoi -
mia san – ob Bass oder Tenöre –
net Profis, sondern Amateure“
De oan g’frein se über neie Lieder –
De andern maulen: „Net scho wieder -
wos Nei’s“ – es waarn doch no
so’n scheane oide Schlager do.
Da Martin ko – so scheint’s – zum Glück
Bis jetz vatrog’n eier Kritik
Doch möcht an eich i appelier’n:
Dent’s net zu vui rumkritisier’n
an eierm Trainer – so an Mo –
waar’n andre - wenn’s n hätt’n - froh!

Wos i bemerkt hob mit Entsetzen:
Ihr deant’s eich ganz sche runter setzen
ois Männer gegenüber Frauen.
Ma braucht so Texte bloß o’schauen:
Ois „Meisterstück“ deant’sas besinga -
möcht‘s eana Badewasser dringa!
mir scheint, ihr woit’s mit solchen Reimen
a bisserl bei de Weiber schleimen.

Des Badewasser – ma hot‘s g’spürt,
war net optimal temperiert
bei eierm Auftritt in Woadhofa.
o.k. – do is‘ noch schlechta g’loffa
bei and’re – de san ganz abgsoffa.
Ehrlich g’sagt, häts mi intressiert:
Wer hot de Presse so guat g’schmiert,
dass in da Zeitung war zum les’n
des waar a „Klangerlebnis“ g’wes’n?
Bloß do muaß I de Zeitung lob’m:
Auf’m Buidl warn de schönstn drob’m!

So wia ma hört habt’s nächstes Johr
Wieda an Vereinsausflug vor.
De Planung war, seit ma z’ruckdenkt
oiwei am Augustin Jak g’hängt.
Aber der wui d‘ Altersteilzeit-Rent’n
aa auf den MGV anwend’n.
Eam deana, s derf ma net vergess‘n
Aa de Alpakas ganz schee stress’n:
An Tierarzt hot er engagiert,
damit der eam an Hengst kastriert.
Doch ohne Hoden war des Tier
So agressiv wia vorher nia!
(ganz ehrlich g’sagt, versteh‘ ois Mo
dem Hengst sei Reaktion I scho)
Letztendlich war des Viech dann g’schlacht‘
Und a Kamelwurscht daraus g’macht.
Da Jak hot – weng am schlecht’n Gwiss’n -
vo dera Wurst nia runterbiss’n.
An Grobstoa hat er gor desweg’n
aufg’stoi’t - vor seim Haus - dort kennt’s n sehng

Im Himme gibt‘s – ihr glabt’s as net
an Anschluss jetz ans Internet
Mit super Upload, himmlisch schnell
Drum hoaßt’s ja aa „H“-DSL.
Do hob I vorhin nomoi g’schwindt
g’schaugt, wos unter „MGV“ I find.
Und wirkli – kam klick I do drauf
Baut se a tolle homepage auf!
Schaug i in’s Impressum glei genauer:
Aha – Webmaster Hegenauer.
Respekt! Da Arnold hot do allerhand
Arbat neig’steckt und Sachverstand!
Er hot sogor so manches Liad
Wo’s g’sunga habt’s dort installiert.
Klickst auf „Termine“, siehgst du g’wiss,
wann de nächste Gesangsprob is.
(weil - des wos in da Zeitung steht
unter „Termine“, stimmt eh meist net)
Klick’st auf den Knopf „Aktivität’n
Nachad sehg’n d‘ Sänger glei wo’s hättn
eigentlich mit dabei sei soll’n –
aber net kinnt hob’m oder gar woll’n?

Des Woll’n - möcht I zum Schluss aufgreiffa -
Is ‚s Wichtigtste! Lasst’s as net schleiffa!
Seid’s ehrgeizig, zoagt’s guat’n Willen
lasst’s eich vom Chorleiter hart drillen!
Schaut’s dass eich steigerts, strengt’s eich o
des Potenzial dafür waar do!


Jetz moan I, is für heit gnua g’sagt
I hoff, dass koana sich beklagt,
dass zwar von Manchem war de Red –
aber vo eam wieder moi net.
Da Nikolaus, des derft’s ma glab’m –
duat oisam vo eich gleich gern hab’m,
schickt seinen Seg’n auf oi herab,
sagt „Pfüat eich, Sänger“ und haut ab!
 

Zuletzt geändert am: 18.12.2011 um 15:43